SPAOH, 22 Julai: Raban administrasyen baka Opis Residen enggau Opis Pelilih Mit Spaoh dipinta mantaika buah penemu ke baru sereta patut kreatif nusun program ke engkeman diatur ba Kampung Manggut.
Kaban Parlimen Betong Dr Richard Rapu madah nya beguna amat dikena ngeranchakka agi aktiviti sosioekonomi seraya nyungkak penatai pemisi rayat ke diau besemak.
“Aku minta ngambika opis administrasyen kitai sekalika nya Opis Residen tauka Opis Pelilih Mit sama berunding, nama program bukai ke ulih meri pemaik ngagai kitai ditu (Kampung Manggut).
“Tu beguna ngambika juluk kitai deka nyungkak sosio ekonomi pengani ba sitak tu. Nya alai, Opis Residen, Opis Pelilih Mit, Opis Pelilih Betong berunding mih, nama aktiviti sekalika nya bejual tauka program bukai,” ku iya.
Iya mansutka penemu nya maya nangguhka Pesta Buntal Bagi Menua Betong 2024 di Diwan Sri Saribas Kampung Manggut, ditu kemari.
Ku iya, nengah buah penemu ke kreatif nya tentu deka ngangkatka pengelebih ke bisi dikembuan ba Kampung Manggut sereta meri penguntung ngagai mensia mayuh ke diau besemak.-TVS
