BINTANGOR, 21 Julai: Penumbuh Turu Ekonomi Gagasan Anak Sarawak (TEGAS) mandangka pengeransing perintah ngagai pemansang modal mensia bekualiti, bepengelandik, kompeten enggau ulih besemekih ba renggat dunya.
Kaban Kunsil Nengeri (ADUN) Meradong Datuk Ding Kuong Hiing madah pengawa nya seriris enggau konsep pelajar ungkup semua ngambika genap rayat nadai ngira bansa tauka pengarap ulih ngiga mayuh agi penemu.
“Kitai patut berasai betuah laban bisi diberi bantu sereta sukung baka ke bisi sehari tu.
“Nya alai, sekali agi aku nesau bala madi enggau apai indai sama ngerebut peluang ke bisi uji ngelawa eksibisyen ke udah disediaka raban TEGAS,” ku iya.
Iya madah munyi nya maya bejadika Pengerami Roadshow Pro-DR Pelilih Meradong ba Diwan Komuniti Bintangor, kemari.
Kuong Hiing nyemetak madahka pemansang modal mensia endang tiang pemun sereta mantu ngetanka pemansang ekonomi menua.
Ku iya, pemisi raban pengereja pengawa ke ngembuan pengelandik ikas tinggi dalam mantu semua sektor ekonomi bejalaika aktiviti bepelasarka penemu, teknologi enggau inovasyen.
Nya alai, ku iya polisi pelajar tinggi pechuma ti deka dikemeranka perintah nengeri berengkah taun 2026 endang jereki ngagai anak Sarawak.
Polisi nya ku iya, patut diguna sida ke rebak baru enggau manah lalu patut temegah laban Sarawak nyadi nengeri keterubah di Malaysia nyendiaka peluang baka nya.-TVS