SEBUYAU, 21 Julai: Sekula Sekondari (SMK) Sebuyau deka digaga baru ba siti taba baru nukar begunan ke udah balat repuk.
Menteri Utiliti enggau Telekomunikasyen Sarawak, Dato Sri Julaihi Narawi madah, bisi kelai positif bekaul enggau atur ngemanah baru sekula nya beduduk ari penanggul nya suah dipadah ngagai raban bekaul.
Julaihi mega nerang nadai timpuh kemaya perambu ngaga sekula nya digaga baru nyentuk sekula baru nya tembu digaga, tang iya madah diri deka ngulurka bantu belanja dikena ngemanah infrastruktur ba sekula nya.
“Lebuh pekara tu suah dipadah ngagai raban bekaul, aku udah meda kelai sida deka bejalaika atur ke patut enggau berumban ngaga sekula ganti penuh, SMK Sebuyau ba taba baru di Bandar Baru Sebuyau.”
“Seraya nganti sekula baru nya tembu digaga, aku deka terus mantu ngemanah perengka infrastuktur ba sekula ke diatu ngambika lantang alai nembiak belajar.
“Aku udah ngemendarka agih belanja dikena ngaga Diwan Komuniti baru beungkus RM500,000 semka taba Gelanggang Futsal, nyadi aku ngarap pengawa ngaga perengkaguna nya ulih berengkah jampat laban chukup beguna ngagai SMK Sebuyau,” ku iya.
Iya ke mega Kaban Kunsil Nengeri (ADUN) Sebuyau mansutka pekara nya maya Ngelanjarka Program Pelajar Menua Pesisir Bandar SABATI-Petros, Seminar Penyulut SPM 2024 diatur ba Diwan Mayuh Guna ditu, kemari.
Ku tandu Julaihi taja pan betapi enggau penanggul infrastruktur sekula, iya tetap keran meda semua 251 nembiak ba lima buah sekula ari Sebuyau, Sebangan, Semunjan, Sri Sadong enggau Gedong ke ngambi bagi ba program ke diatur pengelama dua hari berengkah ari ensana nya bulih pemutus ke lati ba SPM 2024.
“Aku ngarap nya (sekula repuk) ukai nyadika penanggul tauka ngeruga semangat bala kita ke nembiak belajar laban aku pechaya kitai mega ngembuan pemintar ke sama baka nembiak ba menua bukai,” ku iya. -TVS
