SIBU, 21 Julai: Program tambah tauka subjek pasal sejarah Sarawak diperambu dipejalaika nyadi pemungkal dikena narak pemereti ati pasal Hari Sarawak, ku Datuk Michael Tiang Ming Tee.
Ku Sapit Menteri Pengerai Mensia Mayuh, Pengawa Berumah enggau Perintah Lokal Sarawak nya madah perambu tu nyangka ulih nyadi siti pilih digaga laban deka nepu sejarah Sarawak dalam bup teks sekula sechara nasional tentu ngambi timpuh ke lama.
“Nyema enda ulih nepu sejarah Sarawak dalam bup teks ba renggat nasional tu, aku ngasai Sarawak patut berengkah nepu sejarah Sarawak dalam bup teks sekula kitai (Sarawak).
“Kitai ulih ngereja nya laban program tambah tauka subjek di sekula-sekula Sarawak. Aku ngasai nadai penanggul perintah Sarawak ngatur nya,” ku iya.
Tiang ke mega Kaban Kunsil Nengeri (ADUN) Palawan madah munyi nya maya dirandau pemberita pengudah bejadika Program 722 Run For Sarawak di Stadium Tun Zaidi Sibu, pagi tadi.
Dulu ari nya, Tiang ba jaku iya meri sukung penuh ngagai penerang dipansutka Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Penguang Manggil ti merambu ngasuh sejarah Sarawak dipasuk dalam bup teks sekula.
Ku iya, Sarawak endang sebagi ari Malaysia lalu semua rayat di menua tu patut meretika sejarah Sarawak enggau mega Sabah maya numbuhka menua Malaysia.-TVS
