SARATOK, 21 Julai: Kaban Kunsil Nengeri (ADUN) Krian muji pemujur Tuai Rumah enggau Tuai Raban Bansa (KMKK) di Saratok ngatur sesebengkah program.
Ku iya, diatu KMKK diperati majak landik sereta regas ngatur ngatur pengawa lalu nadai agi semina nengkila aja baka dulu suba.
“Reti iya tadi bisi ubah bisi insur tauka pemanah ari segi pengulih Tuai Rumah enggau Tuai Raban Bansa (KMKK) di Saratok enggau Roban tu.
“Tu mih utai ke patut nyadi, kitai enda ulih agi baka suba baka kelia semina bekeredut dada ngemata tang (diatu) kitai mesti deka proaktif, regas agi.
“Kitai ke nyadi tuai ba renggat baruh ngembuan nembiak redak diiring nyadi kitai bala tuai-tuai rumah enggau penghulu mesti bisi pengelandik ngatur pengawa (program),” ku iya.
Iya madah munyi nya maya Pengerami Ngiling Tikai Gawai Dayak Betong 2024 diatur Gerempung Pengintu Pengelantang Tuai Rumah Pelilih Saratok enggau Kabong di Diwan Tebuka SJKC Min Syn Saratok, kemari.
Ku iya, raban KMKK patut neruska pengawa manah nya awakka lebih muntang ngatur program ke lebih besai dudi hari.
Sama bisi ngulu pengerami nya ADUN Kalaka Mohd Duri, ADUN Meluan Roland Duat Jubin, Sekretari Politik Premier Sarawak Brian Fung enggau ke bukai.-TVS
