BINTANGOR, 21 Julai: Genap guntung pendiau enggau rumah panjai ba sitak Kunsil Nengeri (DUN) Meradong dilalau nyendiaka palan macha bup dikena nerenak pengerindu macha ba raban pengani ke diau dia.
Beduduk ari nya, ADUN Meradong, Datuk Ding Kuong Hiing madah diri sedia ngagihka belanja khas kelai nyukung prgram nya.
“Enti rumah panjai bisi komiti JKKK, lalu nuan mesti engkah (bup) dia ngambi bala nembiak macha. Aku semina ulih nulung nyendiaka bup nengah bantu Librari Nengeri Sarawak.
“Genturung pendiau mega nyema bisi endur alai nyimpan bup engga majalah, aku ulih meri belanja,” ku iya.
Iya madah munyi nya maya bejadika Pengerami Roadshow Pro-DR Pelilih Meradong ba Diwan Komuniti Bintangor, kemari.
Ku tandu Kuong Hiing, ulah rindu macha ukai semina numpu ngagai raban ke agi belajar tang mega mungkur semua renggat komuniti , nyengkaum apai indai enggau komuniti lokal.
Tambah mega nengah pemisi komuniti ke kaya budaya, ku iya. Sarawak diatu ngembuan rayat ti kreatif, berunding tebuka enggau ulih nempa peranak menua pesisir tetap bisi pengulih.
Nya alai, iya muji inisiatif Librari Nengeri Sarawak enggau Librari Mensia Mayuh Bintangor laban udah ngatur program nya.
Program nya ku iya, ukai semina mantu rayat Sarawak nyadi komuniti ke bepenemu tang mega pandai sereta berinformasyen.-TVS
