KUALA LUMPUR, 20 Julai: Atur pengawa nyual enggau meli saham Affin Bank ti dipenggi Lembaga Tabung Angkatan Tentera (LTAT) ngagai Perintah Sarawak dijangka tembu bulan baru.
Premier Sarawak, Datuk Patinggi Tan Sri Abang Johari Tun Openg madah, naka ke diatu piak iya enggau LTAT benung nganti pemendar kepenudi ari Bank Negara Malaysia (BNM) bekaul enggau aspek pengawa merati.
Ku Abang Johari, Perintah Sarawak udah nerima pemendar tumu kena 12 Jun lalu agi nganti sekeda dokumentasyen enggau undang-undang tembu diatur.
“Pengudah pemendar dijapai, Perintah Sarawak deka nambahka pemegai saham blok nya ngagai lebih 30 peratus enti dibanding enggau lima peratus ke diatu,” ku iya.
Abang Johari ngulu Pengerami Nyain Sempekat Pemereti Ati (MoU) Kerejasama Strategik ti ngaul Perintah Sarawak enggau LTAT ba Menara Affin, Tun Razak Exchange (TRX) kemari.
Sekretari Pekara Wang Nengeri Sarawak, Datuk Seri Dr Wan Lizozman Wan Omar ngarika Perintah Sarawak,seraya Tuai Pegawai Eksekutif LTAT, Mohammad Ashraf Md Radzi nyain MoU nya ngarika kaunsil nya.
Pengerami nya bela digulu Sapit Menteri Besai, Datuk Seri Fadillah Yusof, Sapit Menteri Pengelikun, Adly Zahari, tiga Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan, Datuk Amar Dr. Sim Kui Hian enggau Sekretari Perintah Nengeri Sarawak, Datuk Amar Mohamad Abu Bakar Marzuki.
Ngelansa silik pasal pekara ti agi nganti pemendar kepenudi dikena nambahka pemegai saham nya, Abang Johari madahka semua penerang ti beguna udah dianjung ngagai BNM.
“Bisi tiga pekara mit aja, kami udah nyediaka nya tang proses (pemendar) nya enda begunaka timpuh tekala nya, nyadi aku melabaka sebulan,” ku iya. -TVS
