KUALA LUMPUR, 20 Julai: Affin Bank bidi daya nyukung penumbuh Dagang Mit enggau Sedang (PKS) di Sarawak ti bisi kaul nyadi vendor dalam ekonomi gadung ti benung ngerembai.
Premier Sarawak, Datuk Patinggi Tan Sri Abang Johari Tun Openg madahka, ambika chunto industri hidrogen begunaka servis vendor ba pengawa nyeruri.
Kelimpah ari nya, iya madahka loji metanol nya mega bepanggai ba pengelandik injiniring ti dibekal ulih vendor PKS nya.
“Sida (vendor) begunaka puku lalu ditu meh endur bank ulih (nulung) ngambika (terus) mansang,” ku iya madah ngagai TVS.
Dulu ari nya, Abang Johari ngulu Pengawa Nyain Sempekat Pemereti Ati (MoU) Kerejasama Strategik ti ngaul Perintah Sarawak enggau LTAT ba Menara Affin, Tun Razak Exchange (TRX) kemari.
Abang Johari nerangka, di Sarawak mayuh macham pemansang ekonomi ke benung ngerembai sereta begunaka sukung enggau bantu ari bank dagang.
“Nya nyengkaum pengawa nyeruri enggau konstruksyen rentayan jalai, bekal kereban dikena berumah enggau mayuh agi.
“Kitai (Perintah Sarawak) deka PKS kelimpah ari industri pemakai bela ngaul diri dalam aktiviti ekonomi tu,” ku iya.
Tandu iya, enti nyema Sarawak bisi megai taruh tauka saham dalam bank dagang, kerejasama nya tadi ulih dikemujurka enggau muntang agi.
“Bank bukai bisi tang kekadang proses nya chukup panjai,” ku Abang Johari. -TVS.
