BETONG, 15 Julai: Taba endur ngentak rumah baru ungkup siku orang tuai Renang Saying ke tebunsa idup sebatang kara ba Meruji Kabo Saratok sebedau tu udah dikelala.
Kaban Kunsil Nengeri (ADUN) Krian Friday Belik madah pengawa ngaga rumah baru ungkup orang tuai nya dipelaba deka berengkah bulan Ogos tu.
“Kitai udah ngelala taba tanah endur ngaga rumah tudah Renang anak Saying ke diatu diau ba sebuah langkau repuk lalu kitai naka ulih mantu.
“Kitai ngarapka agih belanja dikena ngaga rumah baru ungkup iya dikemendar enda lama agi sebedau Ogos tauka sebedau apus taun tu.
“Kitai meda endur taba rumah chukup engkeman alai ngentak rumah baru,” ku iya.
Iya madah munyi nya pengudah tembu Pengawa Nyuaka Chek Pampas Tanah di Spaoh, pagi tadi.
Sebedau tu, kisah pengidup tudah Renang ke ditepan stroke sereta idup sebatang kara dikerembai ba media rama nyentuk nerima bemacham timbal ari mensia mayuh.
Nitihka rikod, tudah Renang siku ari penerima bantu ninting bulan ari Opis Pengintu Pengelantang Raban Bansa (JKM) sepenyampau RM250 kenyau ari taun 2011.-TVS
