SPAOH, 15 Julai: Opis Menteri Industri Pemakai, Komoditi enggau Pemansang Wilayah Sarawak (M-FICORD) deka terus chakah munaska penyeranta rayat menua pesisir nengah pengawa betanam betupi moden.
Menteri iya, Dato Sri Dr Stephen Rundi Utom madah, ba jeman moden diatu enda ibuh irau bekaul enggau pemanah tanah dikena bejalaika pengawa betanam betupi.
“Kitai enda ibuh irau pasal pemanah laban kitai bisi kereban ‘Green House’, SPF, Infrastruktur Nyaga Ujan enggau ke bukai.
“Tu ulih digaga kitai nengah chara nanam baka ke dipandang atas panggau tu hidroonik enggau ke bukai.
“Nyadi kitai mega bisi Akuaponik tauka siti konsep ke dikumbai kitai ‘Farm To Table’ reti nya endur ke sama alai nama nyentuk ulih dijual ngagai palan ke sama.
“Ambika chunto restauran kitai meda ba Jalai Kulas di Kuching di bisi konsep bekebun ke meja,” ku iya.
Rundi madah munyi nya maya dirandau media pengudah Nangguhka Spaoh Agrofest 2024 di Spaoh, kemari.
Ku iya, raban pekebun mega patut berani ngubah runding enggau anang kereja kediri tauka majak ngena chara lama.
“Iya ke pemadu beguna kitai patut ngubah runding untung rugi tu.
“Orang kitai enda nemu pasal untung rugi tang iya semina gawa aja nitih chara lama.
“Nya mih dikumbai kitai ngatika diri,kitai enda ulih kelalu ngatika diri baka nya laban nadai untung.
“Dalam ngereja pengawa betanam betupi kitai mesti ngiga untung nyadi baru orang biak ngasai tepaut ati lalu sama ngambi bagi ba sektor betanam betupi.
Rundi mega meransang pekebun di menua tu patut nunda pekebun ba menua maju baka Taiwan, Australia enggau New Zealand bekena ke teknologi moden dalam bekebun.
Nya alai, nyema nya mujur tentu tikas penyeranta ba menua pesisir di Sarawak ulih dipunas enggau tentu pekara nya deka matak pengerindu sida ke biak masuk bidang betanam betupi.-TVS
