KUALA LUMPUR, 15 Julai: Kedu Kaban Kunsil Nengeri (ADUN) Nangka, Datuk Awang Bemee Awang Ali Basah, udah mujur angkat sumpah nyadi Kaban Dewan Negara, sehari tu tadi.
Iya deka bejalaika tangkup pengawa nya berengkah ari sehari tu (15 Julai) nyentuk 14 Julai 2027.
Pengudah dichiri atas langgur penemu Premier Sarawak, Datuk Patinggi Tan Sri Abang Johari Tun Openg.
Awang Bemee ke mega Penyanding Penemu Undang-Undang Parti Pesaka Bumiputera Bersatu (PBB) ba mua Sapit Yang Dipertua Diwan Negara, Datuk Nur Jazlan Mohamed.
Kelimpah ari nya, iya ngasaika penyiri nya siti basa ke chukup besai ngagai Sarawak.
“Nyadi anak Sarawak, tu nyadika peransang ngagai (aku) ungkup bejalaika servis ngagai menua.
“Aku deka meri servis ke pemadu manah ngagai menua,” ku iya.
Awang Bemee, 65, ngepunka karier nyadi pemekuh undang-undang ba Kort Tinggi Borneo dalam taun 1984 enggau ngembuan peneleba ngatur kes sivil sereta jenayah nyangkaum ba Kort Konstitusyen Perintah Besai.
Iya mega megai sekeda pangku pengawa besai baka Chairman Kaunsil Palan Penyangkai Kapal Kuching enggau Direktor Sarawak  Plantation Berhad.
Ngelansa pengawa dalam bidang politik, Awang Bemee kala dipilih nyadi ADUN Nangka pengelama tiga penggal berengkah ba taun 1996 nyentuk taun 2011.-TVS
