BALI, 14 Julai: Semua nengeri mesti bisi pengagit bepekit ba program lumba enggau main ti bisi diatur ba menua tu dikena ngadaka atlit menua ti bekualiti.
Penemu nya dipansutka Sapit Menteri Dagang Temuai, Industri Kreatif Enggau Seni Pemerindang Sarawak Datuk Snowdan Lawan.
Iya madahka, pekara baka nya enda kala ayan ba dalam pengawa pengatur lumba enggau main ba wilayah tu, sereta Sarawak seruran komited ngambi bagi ba dalam bemacham program ke bekaul ti bisi diatur.
“Semangat bepekit, kitai enda kala ngaga mantaika ripot (sebana), engka bisi tang semina pasal lumba enggau main aja.
“Tang, enti pasal bajet sigi udah lama baka ti disebut menteri.
“Sigi nguna kos ke besai lebuh mai kontinjen kitai ari Sarawak ke Semenanjung.
“Udah beberapa taun kitai udah ngambi bagi dalam SUKMA tu.
“Taja pan napi kos ke besai, tang kitai tetap ngambi bagi ketegal semangat deka bepekit,” ku iya.
Iya mansutka jaku nya rambau meri timbal penemu senentang penerang dibantai Menteri Besai Kedah, Datuk Seri Mohammad Sanusi Md Nor ti ngarapka Sarawak ke nyadi tuai rumah ngatur SUKMA Edisyen Ke-21 nanggung mimit kos nganjung kontinjen Kedah ke deka enggau pekit SUKMA.
Snowdan nerangka, Sarawak ngelamatu sigi nanggung kos ke besai tetiap kali ngambi bagi ba dalam achara ke diatur di Semenanjung Malaysia.
“Sigi begunaka kos ke besai, tang kitai ngiga chara kediri empu ti ngambi bagi achara lumba enggau main di Semenanjung,” ku iya.
Iya mansutka jaku nya rambau dirandau beserimbai enggau Program Bawa Keindahan Seni Sarawak Ke Mata Dunia: Bali Art Festival 2024.
Dulu ari tu, Mohammad Sanusi madahka, kos ngambi bagi dalam SUKMA serak tu kelalu besai ti dibanding taun sebedau tu, nyerangkung rega tikit enggau mai perengka ke bekaul.
Sanusi madahka, kontinjen kedah mai sekeda kontina perengka ke Sarawak sereta iya pechaya nengeri bukai pan napi penanggul ke sama.-TVS
