BINTULU, 13 Julai: Sektor betanam betupi mujur ngenataika asil manggai RM14 bilion ngagai Asil Pemansut Kasar Dalam Menua (KDNK) Sarawak taun 2022.
Premier Sarawak Datuk Patinggi Tan Sri Abang Johari Tun Openg madahka, pemujur nya mandangka sektor nya ngesan tanggungpengawa ke chukup beguna ungkup pemansang ekonomi Sarawak.
Abang Johari nerangka, asil nya ngarika 10.4 peratus penyampau semua KDNK Sarawak ba taun nya enggau nyadi entara pemadu besai pengudah sektor servis, ngaga barang, ngelembang enggau
kuari.
“Bepelasarka asil tu enggau latar belakang asil tanah ti dikemisi Sarawakm kelimpah pengereja pengawa, kitai mega mesti bejalaika reformasyen dikena ngemansangka sektor pemakai,” ku iya madah.
Iya mansutka jaku nya rambau Program Bejadika Sarawak Agrofest 2024, ditu kemari.
Sama bisi ngulu program nya, Menteri Industri Pemakai, Komoditi enggau Pemansang Wilayah Sarawak ke mega Kaban Kunsil Nengeri (ADUN) Kemena Dato Sri Dr Stephen Rundi Utom.
Berebak enggau nya, ngelansa pasal Sarawak ti diaku nyadi nengeri bepenatai pemisi tinggi dua taun bejurut ari Bank Dunya empai lama tu tadi, iya nerangka perintah Sarawak deka bekunsika pekara ya dikena nambahka penatai pemisi ruang bilik rayat ba wilayah tu.
“Siti ari chara tu iya nya negapka sektor ekonomi menua pesisir nengah sektor betanam betupi.
“Nya alai, Dato Sri Dr Stephen Rundi Utom enggau kaban iya dalam kabinet deka besaup ngempung semua komponen ti diguna kitai nambahka asil ekonomi menua pesisir nengah sektor betanam betupi sereta jamin pemakai,” tandu iya.
Program Sarawak Agrofest 2024 benung diatur ba Padang Bilun Lama Bintulu berengkah ari 12 nyentuk ke 22 Julai tu. – TVS
