SPAOH, 13 Julai: Palan Penyulut Teknikal Sarawak (Centexs) Betong mujur ngerikodka urung 500 penyereta kus dilatih sepanjai Program Kimpin Teknologi Komuniti tauka (CTOP) di Bagi Menua Betong kenyau ari Januari nyentuk June taun tu.
Penulung Menijar Centexs Betong Mohamad Zulhairi Talip madah, kus nya mungkur Kus Pengelandik Krafjari, Fertigasyen, Hidroponik, Nanam Kulat Tiram enggau Ngaga Kerupuk Lekor.
“Centexs Betong udah ngatur sekeda program timpuh pandak tauka dikumbai CTOP ba sekeda endur ke semak ngelama tu.
“Kami bisi ngatur ba Spaoh iya nya Kus Ngaga Kerupuk Lekor enggau ba Kampung Hilir Kupang Saratok kami ngatur tiga kus iya nya Kus Festigasyen, Hidroponik enggau Nanam Kulat Tiram lalu nya chukup manah timbal sereta nerima puji ari peranak genturung pendiau tu minta kus terus diatur,” ku iya.
Iya madah munyi nya maya dirandau ba palan Program Spaoh Agrofest 2024 di Pelaman Spaoh, kemari.
Udah nya, iya mega bisi madah raban Centexs Betong deka terus negapka Program CTOP bekau ari timbal ke chukup manah ari komuniti di menua pesisir.
Enda lama agi ku iya, Centexs Betong deka ngatur kus timpuh pandak ba Sri Aman ngaul empat kus iya nya Kus Ngaga Kain Buri, Ngaga Sugu Tinggi, Nusuk Manik enggau Nyadi Penganta (Make-Up).
Ku tandu iya, bisi lima ngagai enam iti kus deka dibuka ba Centexs Betong udah tu kelimpah ari Kus Elektrikal, Hidroponik enggau Bejait.-TVS
