SARATOK, 11 Julai: Kaunsil Pemansang enggau Pengintu Tanah (LCDA) Sarawak agi benung nembuka Pelin Besai Projek Berumah bepelasarka rumah panjai ba Pelilih Mit Ngaga Budu.
Kaban Kunsil Nengeri (ADUN) Krian Friday Belik madah, projek nya endang sebagi ari projek ke dipejalaika nyengkaum ngaga Mini Stadium enggau balai raya udah diperambu ungkup Pelilih Mit Nanga Budu sebedau tu.
“Kitai deka ngaga rumah panjai lalu sida deka meli rumah nya sereta nguan sitak nya tau dikumbai ngembuan perengkaguna pemun ke chukup moden.
“Nyadi tu mih perambu kitai ungkup siti nya nempa Pelilih Mit Nanga Budi nyadi siti sitak pemansang ke baru di Ulu Krian.
“Raban LCDA benung nembuka Pelin Besai lalu siti ari komponen nya iya nya ngaga rumah kelimpah ari balai raya enggau mega mini stadium.
“Nyadi tu dalam perambu raban LCDA ngemujurka pelin besai di Pelilih Mit Nanga Budu enggau kitai udah ngelala taba ke bekaul,” ku iya.
Iya madah munyi nya maya Pengawa Nasih Tanah Taba Rumah Panjai Sungai Entangor Batu Burak Roban, ditu kemari.
Ku iya, projek nya ulih mutarka penanggul nadai tanah ungkup pengani ba Krian ti deka ngentak rumah panjai baka ke ditapi diatu.
Tandu iya, projek nya deka ngurangka raban ari menua pesisir pindah ke mengeri dudi hari kelimpah nyadi siti ari pengawa dikena ngelengkaska proses pemansang ba Pelilih Mit Nanga Budu nyadi palan pengentap ke baru.
Sama bisi ngulu pengawa nya Kaban Kunsil Nengeri (ADUN) Kalaka Mohd Duri.-TVS
