KUALA LUMPUR, 11 Julai: Menteri Pekara Wang II, Datuk Seri Amir Hamzah Azizan madahka perintah udah ngungkupka penyampau RM3 bilion ninting taun dikena ngangkatmanah pemansang infrastruktur pemun ba kandang menua pesisir.
Ku iya, agih belanja nya ngaul pengawa ngaga enggau ngangkatmanah tikas jalai alun, opis menua pesisir enggau nyeruri lampu ba genturung pendiau.
“Endang amai Opis Menteri Pemansang Tumpuk Pendiau enggau Wilayah (KKDW) iya nya pemungkal besai ungkup pekara ti bekaul enggau pemansang ba tumpuk pendiau.
“Ninting taun, perintah udah ngemendarka agih belanja nyentuk RM3 bilion dikena ngaga tauka ngangkatmanah tikas infrastruktur pemun ngaul jalai menua pesisir, jalai sambung tumpuk pendiau, jematan menua pesisir, masang enggau nyeruri lampu genturung pendiau sereta nyendiaka bekal ai enggau karan ti chukup ungkup peminta guna komuniti menua pesisir,” ku iya.
Iya bejaku munyi nya rambau sesyen tanya saut enggau raban menteri, sehari tu tadi.
Sebedau tu menteri KKDW, Datuk Seri Dr Ahmad Zahid Hamidi madahka opis menteri iya udah nerima agih belanja sepenyampau RM871.24 juta ungkup Sarawak ba taun 2024.
Agih belanja nya ngaul 287 projek ti nyengkaum ari 70 projek baru enggau 217 projek sambung enggau penyampau semua kos Langgur Pemansang Malaysia Lumpar Ke-12 (RMK12) iya nya RM15.01 bilion.-TVS
