SARATOK, 11 Julai: Peminta agih belanja sepenyampau RM600, 000 dikena ngaga parit udah dianjung ngagai Opis Penyangga Penusah Nengeri Sarawak (JPBNS) Bagi Menua Betong.
Kaban Kunsil Nengeri (ADUN) Kalaka Mohd Duri madah, pengawa ngaga dua parit nya chukup beguna dikena mutarka penanggul bah tunggal ke suah nyadi ba Saratok.
“Kitai udah minta (belanja) sepenyampau RM600, 000 ngagai (JPBNS) Bagi Menua Betong ngambika ngaga dua parit dikena mutarka bah tunggal ba Taman Muhibah enggau siti agi ba Pasar Saratok.
“Semua nya udah dikeaum silik dua kali ba Opis Pelilih Saratok betuaika Pegawai Pelilih Saratok.
“Nyadi keretas kereja udah dianjung ngagai JPBNS Betong ngambika pekara diputar lengkas,” ku iya.
Iya madah munyi nya maya bejadika Pengawa Nasih Tanah Taba Rumah Panjai Baru Sungai Entangor Batu Burak Roban, kemari.
Ku iya pengawa dua parit nua deka mutarka penanggul bah tunggal ke suah nyadi ba Pasar Saratok, Taman Muhibah enggau Sekula Primari (SK) Abang Abdul Rahman.
Tandu iya, atur nya endang pemadu nemban dikena mutarka penanggul nya ngambika enda ngeruga sitak bukai ke besemak.
Aum sebedau tu bela digulu pengari ari ejensi-ejensi perintah baka Opis Parit enggau Entali Ai (DID) Bagi Menua Betong, Opis Kereja Raya (JKR) enggau Kaunsil Pelilih Saratok (MDS) awakka sama mansutka buah penemu dikena mutarka penanggul nya.-TVS
