TAJA kala betapi enggau pemedis lebuh keterubah nguji masuk dunya dagang dalam bidang nanam kulat tiram, tang nya enda kala matahka semangat Kamisah Muhhamad,29 taun.
Kulat ke ditanam Kamisah kala rusak abis ba taun 2019 ketegal dituntung penusah ampuh bah ke nyadi ba Kampung Bungey Rebak.
Ba taun 2020, Kamisah mujur bulih agih belanja Geran Agropreneur Muda (GAM) sepenyampau RM15, 000 ari Opis Menteri Betanam Betupi enggau Jamin Pemakai (KPKM) ngujungka iya ulih ngidupka baru juluk iya nyadi pedagang tauka pengeluar kulat.
“Projek nya puntan laban taun nya suah amat ampuh bah nyadi aku enda mantul ati neruska juluk ati diri lalu aku bisi minta siti geran iya nya Geran Agro Betanam Betupi Muda ba taun 2020.
“Ba taun 2024 baru aku bulih geran nya sepenyampau RM15, 000,” ku iya.
Udah nya, iya madah diri ngembuan juluk ke besai deka nyadi pengeksport produk-produk betanam betupi bepelasarka kulat tiram ari menua Betong ngagai menua luar enti Projek Ngaga Padang Bilun Menasan Pandak (StolPort) di Bebuling, Spaoh udah tembu ila.
“Aku mega ngarap diri ulih nyadi siku orang ke mantu nyadi pengeksport bepelasarka betanam betupi iya nya kulat tiram ngagai menua luar ari Pelilih Debak enggau Bagi Menua Betong lebih agi enti udah tembu Padang Bilun Bebuling, Spaoh ila,” ku iya.
Indai ngagai siku anak lelaki ke berumur dua taun nya mansutka penerang nya maya dirandau TVS ba Palan Nanam Kulat Tiram iya empu di Debak, Hari Satu.
Ku terang iya, timbal sereta peminta ari mensia mayuh naka tu chukup manah ngujungka iya ulih tegumpulka penatai pemisi manggai RM1, 460 sebulan.
Kelimpah ari nya, ku Kamisah mega iya ulih teulihka asil manggai RM900 sebulan asil ari pengawa nyual bakut kulat tiram.
Juluk ati ke bukai, ku iya ngarap amat pengawa ke benung dikemansangka iya nya ulih nyadi siti dagang ke terus mujur ngambika ulih dikena sida sebilik beridup enggau nyaup nyungkak ekonomi menua. -TVS
