KUCHING, 8 Julai: Berasai temegah ati meda diatu mayuh rebak baru rindu belajarka main asal nyadika lanting bansa kitai, pia ku Mabong Unggang.
Tuai Akademi Serakup Dayak Iban Sarawak (ASADIA) nya madah sida ke biak tu mih disema ke rambai jaku Iban ‘Pechah Periuk Tanah, Ganti Periuk Petani, Padam Bulan Ganti Matahari, Parai Sida Ke Tuai Ganti Sida Ke Dudi.
“Reti nya, sida ke biak tu mih ke nganti sereta ngema tanggungpengawa ngetan sereta nyungkak main asal kitai jemah ila.
“Aku ngarapka bala apai indai sereta bala ke udah tuai patut terus nyukung ngatur pengawa sida ke biak enggau penemu sereta pengelandik ba main asal,” ku iya madah ngagai Editor Berita TVS empai lama.
Nangkan ke nya, Mabong terus meransang bala apai indai nembiak anang kakang, anang lembau meri sukung sereta nganjung anak diri nyereta kelas belajarka main asal.
“Enti kitai ke udah besi tuai tu enda siru deka ngetanka main asal, sida ke biak sigi enda nemu sereta nadai peluang belajarka main asal nya.
“Nya alai, aku enggau peluang tu nesau barang sapa ti deka nganjung anak belajarka main asal tau datai terus ngagai Opis ASADIA laban kami merambu deka muka baru kelas main asal berengkah ari pun bulan Ogos tu,” ku iya.
Penerang silik ulih ditanya terus nuju iya empu tauka bala kaban ASADIA kelimpah ngelawa laman Facebook Akademi SADIA.
Dulu ari nya, Mabong madah ASADIA udah mujur nembuka Kelas Main Asal Iban Renggat Keterubah 2024 berambaika jaku ; Main Asal Kitai, Tanggungpengawa Kitai.
Penyampau sida ke udah nembuka kelas main asal tu tadi bisi 35 iku ngaul 21 iku ari Kelas Main Asal Ajat Indu diajar Elsie Joaness, Kelas Main Asal Batabuh (7) diajar Victoria Jimy enggau Kelas Main Asal Ajat Lelaki (7) diajar Henry Guya.-TVS
