SARATOK, 8 Julai : Pemujur Dion Das Louis tauka dikangau ‘Litle Borneo Birdie’ bulih dua midul emas enggau dua midul pirak ba Pekit Seni Pemerindang Dunya Ke-27 (WCOPA 2024) di Long Beach California Amerika Syarikat apin lama endang siti pemujur ke chukup besai reti sereta enda disadang.
Apai Dion, Louis Lansam 43 taun ke agi ba Amerika Syarikat maya dirandau TVS madahka, pemujur anak iya nya kelai nyata seni bansa Iban diatu majak dipalik dunya enggau terus dikelala ba renggat antarabansa.
“Aku ngasaika pemujur Dion bulih dua midul emas enggau dua midul priak ba Pekit WCOPA di Long Beach California siti utai ke enda disadang.
“Pemujur nya ngelai seni asal bansa Iban majak dipalik dunya lalu kami kebendar ngelakuka penyelai Sarawak ngagai dunya,” ku iya.
Lansam mega meri terima kasih ngagai semya raban laban udah mantu sereta enda putus meri sukung ngagai anak iya sekumbang nyereta pekit nya.
Antara sida ke udah meri sukung ngelama tu nyengkaum Sapit Premier Sarawak Datuk Amar Douglas Uggah Embas enggau Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan.
“Enggau peluang tu aku deka meri besai terima kasih ngagai semua raban ke udah meri sukung ngagai Dion aka Sapit Premier Datuk Amar Douglas Uggah Embas, Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan enggau ke bukai,” ku iya.
Dulu ari tu, Dion sereta 11 agi penyereta bukai ari Malaysia bela bisi menang midul ba Pekit WCOPA.
Dua midul emas diulih Dion iya nya ba Kategori Tanda Etnik Junior enggau Kategori Gambar Model Junior.
Udah nya, midul pirak diulih iya nengah Kategori Model Formal enggau Kategori Model Kasual Junior.
Pekit WCOPA 2024 diatur belabuh 1 nyentuk 5 Julai tu tadi bepalan ba California Amerika Syarikat.-TVS
