BETONG, 6 Julai: Tim Angkat Berat Sarawak deka bebendar nyapai saran lima iti midul ba Pekit Lumba Malaysia (SUKMA) 2024 ke diatur ba Betong berengkah 19 nyentuk 23 Ogos tu ila.
Tuai Jurulatih Tim Angkat Berat Sarawak Jonathan Partrick madah, lima iti midul tu mungkur dua midul pirak enggau tiga midul engkeraju beduduk ari raban atlit ke deka dikirai iya serak tu ila agi baru sereta empai mayuh peneleba.
“Juluk nyapai midul ari ati aku empu ngasai kami naka ulih nyapai dua midul pirak enggau tiga iti engkeraju.
“Tu laban kitai nemu atlit (Sarawak) agi baru ba main angkat berat semina beberapa iku aja ke udah lama.
“Atur penyikap naka tu endang chukup manah semua bejalai lanchar lalu arapka sida ulih ransing agi (belatih) dikena nyapai pemujur,” ku iya.
Iya madah munyi nya maya dirandau TVS pengudah pengawa belatih ditu, ensana.
Ku iya, rikod ke dipandang raban atlit sekumbang belatih chukup ngemantup ati lalu dikearap ulih nakal belaban nyatup atlit bukai ila.
Nangkan ke nya, dua atlit ke bisi dirandau TVS iya nya Felix Tujang Ik Thupia enggau Brickleen Jessiew madah, seduai iya tentang gagit sereta besemaya deka belaban enggau manah awakka ulih nyaup ngulihka midul ungkup tim angkat berat.
“Ungkup SUKMA serak tu aku ngarap endang midul emas mih laban dua taun aku udah nadai bulih midul,” ku iya.
Udah nya, siku agi atlit Bricklee Jessiew madah saran iya serak tu endang deka bulih emas.
“Aku masuk belatih bedau datai setaun taja pia aku naka ulih ngulihka midup emas. Taja agi baru (ba main angkat berat) Aku tetap deka bebendar ngulihka midul, ” ku iya.
Tim Angkat Berat Sarawak bisi 16 iku atlit benung belatih ba Betong tungkup timpuh sebulan sebedau betapi enggau SUKMA.
Pekit Angkat Berat tu ila deka diatur ba Diwan Pangalima Rentap Betong sereta urung 200 pemekit udah ngenuku diri masuk pekit nya.
Bepelasarka rikod, Tim Angkat Sarawak ngembuan rikod ke nyulut maya SUKMA 2028 di Perak iya nya sida mujur bulih dua midul emas, lima midul pirak enggau enam iti midul engkeraju kelimpah nempa dua rikod baru nasional ba kategori lebih 109 kg Snatch enggau Clean sereta Jerk nengah Jerry Gawan.-TVS
