SARATOK, 6 Julai: Rayat lebih agi di Saratok diperansang terus beserakup enggau meri sukung penuh ngagai Premier Sarawak, Datuk Patinggi Tan Sri Abang Johari Tun Openg ke mega tuai tinggi dalam perintah Gabungan Parti Sarawak (GPS).
Kaban Kunsil Nengeri (ADUN) Krian, Friday Belik madah rayat ba sitak nya patut nemu semina perintah GPS ulih ngemansangka wilayah tu enggau manah.
“Pengawa kitai iya nya siti kitai bepelasarka prinsip ‘Sarawak First, Utamakan Sarawak’, Intu Sarawak.
“Nya alai, nama reti pengawa ditegika kitai tadi?
“Enti kitai beratika chara orang di seberai din deka ngelemika kitai ditu macham-macham jaku pejah ngumbai Abang Jo tu tadi bemimpi, Abang Jo tu limpang ari kunstitusyen MA63 tang kebendar iya kitai semina nagih hak ke endang udah dipekat dalam MA63,” ku iya.
Iya mansutka jaku nya rambau Program Datai Nemuai Ngabas Rayat ba Rumah Panjai Dana Kalimbang di Kerupok Sebetan ditu, kemari.
Ku iya, pemintar enggau pemujur tangkup pengawa tuai Premier Sarawak Datuk Patinggi Tan Sri Abang Johari Tun Openg megai wilayah tu nyata dipeda nyentuk ke nyadi ‘king maker’.
Iya nambah, ngembuan perintah ti kering udah ngasuh Sarawak diatu bibas dalam bejalaika aktiviti pemansang di wilayah tu enggau enda bepanggai seratus peratus ngagai Perintah Besai ari sukut agih belanja tauka ngaga pemutus.
Ba awak ke sama , Friday ngagihka belanja sepanyampau RM150,000 ngagai Rumah Panjai Dana Kalimbang dikena ngangkatmanah perengkaguna rumah panjai nya.
Sama bisi datai ngulu pengerami nya Kaban Diwan Negara Senator Pele Peter Tinggom.-TVS
