KUCHING, 6 Julai: Parti Pesaka Bumiputera Bersatu (PBB) deka netapka pemutus pasal penumbuh sayap baru ngaul raban buang dara (bujara) ba konvensyen parti nya ke ditaga diatur ba suku keterubah taun baru.
Presiden PBB, Datuk Patinggi Tan Sri Abang Johari Tun Openg madah, sayap baru nya ila deka diarika raban bujara ke beumur antara 18 nyentuk 28 taun.
“Diatu, kitai numbuhka komiti ti betuaika Sapit Presiden PBB, Datuk Amar Douglas Uggah Embas enggau bala bakih ketuai ke bukai ngambi nyerariska Aum Besai kitai ila ke berengkah ari renggat pating, pampang nyentuk ngagai konvensyen besai ke ditaga diatur ba pun 2025,” ku iya.
Iya madah munyi nya pengudah betuaika Aum Keenam Supreme Kaunsil Parti Pesaka Bumiputera Bersatu (PBB) Sarawak (6/15), ba Indu Opis PBB di Jalai Bako, sehari tu tadi.
Maya 2022, Abang Johari madah, penumbuh sayap bujara PBB endang atur ke jauh timpai parti nya dikena nempa rebak ketuai ke bepenau ungkup ngiring nengeri tu jemah ila.
Ku iya, sayap bujara nya deka nyadi pelasar endur ngelatih sida ke beumur 18 taun ke atas neleba diri ba politik sechara rasional. -TVS
