BETONG, 6 Julai: Pemisi jaku iban ba dalam rintai ‘Google Translate’ endang berita manah legih agi ngagai bansa bukai di seraya dunya ti bisi ati deka belajarka jaku Iban.
Prinsipal Sekula Sekondari (SMK) Saint Augustine Ujai Sambau madah, pemisi jaku salin Iban dalam Google Translate tu deka ngemudah ukai semina ngagai nembiak sekula tang mega ngagai semua komuniti bukai ti deka nemu reti salin jaku Iban.
“Manah amat nya peda aku laban meri pemaik ngagai orang bukai baka nembiak sekula ti deka belajarka jaku Iban,” ku iya maya dirandau TVS ba sekula nya empai lama.
Udah nya, ba penemu siku agi pengajar Resa Bilie madah pemisi jaku salin Iban nya dalam google ngelai jaku Iban udah sama ikas enggau jaku bukai ba dunya.
“Aku berasai temegah ati laban tu ngelai jaku Iban diatu nyamai ditemu orang ba serata dunya, munyiku sempama tau dikumbai ‘bediri sama tinggi, duduk sama baruh’ enggau jaku bansa bukai,” ku iya.
Bela bisi mansutka penemu siku pengajar jaku Iban ba SMK St Augustine Timothy Salang James Anin madahka pemisi jaku salin Iban nya deka nyadi malin sereta kereban bantu ngagai bala nembiak sereta pengajar ba sekula.
“Sekumbang udah nemu bisi jaku Iban dalam Google Translate tu tadi dia berasai gaga endar ati laban nya ulih mantu bala pengajar enggau bala nembiak belajarka jaku Iban.
“Ari Google Translate nya mega ulih nyadi sanding tauka kereban sangking dikena belajar, kelimpah bemalinka bup teks,” ku iya.
Nya alai, meri terima kasih ngagai raban ke udah teulihka runding mujur bejalaika inisiatif ke chukup manah baka nya dikena ngerembaika bungkur jaku Iban ngambika terus dikelala mensia mayuh ba serata dunya, ku tandu iya.-TVS
