MIRI, Julai 5: Opis Kastam Diraja Malaysia (JKDM) Sarawak mujur ngerampas 24 iti kutak kargo ti dipelabaka ngundan dadah bansa ketamin ti berega lebih RM2.4 juta ba pengawa ngerap dipejalaika kena 27 Jun tu tadi.
Direktor JKDM Sarawak, Norizan Yahya madah, ba pengawa ngerap nya mega mujur nangkap siku saspek lelaki lokal pengudah minta kutak nya ari kompeni penganjung kargo langit ti diengkah dalam sebuah kerita Nissan Almera.
“Pengawa meresa tumu kereban pengangkut nya bisi tetemuka 24 kutak barang ti ngundan kereban dikena ngaga sabun, enggau tiap kutak ngundan siti kereban ya.”
“Peresa enggau silik agi semua kereban ngaga sabun nya udah nya mega tetemuka 48 bungkus plastik ke ditulis ‘Tie Guan Yin ngundan leka kristal enggau dua bungkus nya dilalaika ba tiap iti kereban dikena ngaga sabun nya.”
“Pemutus peresa tumu, leka krisital nya ditemu bansa ketamine enggau anggar pemerat 49,318 kilogram (kg) enggau anggar rega RM2,465,900,” ku iya.
Iya madah munyi nya ba aum pengarang berita di Opis Kastam Diraja Malaysia ditu, sehari tu tadi.
Norizan mega madahka sindiket ke bisi kaul ngena modus operandi enggau chara mai dadah belalai nya nengah chara ngumbai kereban dikena ngaga sabun sebedau iya dianjung ngagai keldai dadah.
Saspek ke mai dadah nya udah dibai ngagai Kort Miri kena 28 Jun tu tadi sereta diperintah ditan riman pengelama enam hari dikena mantu mansik kes nya.
Diatu kes nya benung dipansik nitihka Seksyen 39B (1) Akta Dadah Berbahaya 1952 ti nyema ditemu salah ulih tinggang ukum mati ngena chara gantung tauka jil seumur idup lalu deka diukum enda kurang ari 15 kali lunsin nyema enda diukum mati. – TVS
