KUCHING, Julai 5: Pengawa nyual tikit pemadu tumu Super Borneo Sonic Music Festival (BSMF) 2024 ti nyendiaka diskaun besai deka berengkah dijual pukul 12 tengahari, Hari Enam tu.
Direktor Pengatur Pengawa BME Antarabansa (Malaysia) Steven Au madah, orang ke deka meda pengerami nya dilalau meli tikit enggau lengkas laban dipelabaka deka abis tumu dalam timpuh ke pandak.
Ku iya nerang, raban pengatur gagit deka meri diskaun nya ngagai bala peminat taluk BSMF sereta mega sida ti merambu deka meda keterubah iya.
“Pengawa taun tu deka nyadi pengerami ti pemadu besai sereta pemadu manah bemacham program ke udah ditusun. Sida ngembuan mayuh macham peneleba ti tentu deka nyadika BSMF 2024 nyadi pengerami ti enda ulih diseliah,” ku iya nengah penerang media.
Steven nambah, pemeli tikit tumu mega bepeluang bulih baju-T BSMF 2024 edisi betatak ti ulih ditebus enggau tali lengan sereta bulih penuduk khas meda konsert nya.
Sida ti deka meli tiket tau ngelawa laman web www.borneosonic.com.
BSMF deka diatur kena 11 enggau 12 Oktober tu ila ba Stadium Sarawak ti dipelaba deka datai lebih 36,000 iku orang.
Pengerami ke diatur BME International Sdn Bhd tu mega nyengkaum Karnival Makanan Borneo Sonic kena 9 ngagai 12 Oktober 2024 ba Stadium Square berengkah pukul 12 tengahari nyentuk 12 tengah malam.
Pengawa tu nerima sukung penuh ari Opis Menteri Dagang Temuai, Industri Kreatif enggau Seni Pemerindang Sarawak. -TVS
