SRI AMAN, 19 June: Ejensi Pemansang Sri Aman (SADA) diatu majak dikelala sereta terus chakah ngambi bagi ba genap program ke bisi diatur komuniti di Sri Aman.
Chairperson SADA, Dato Sri Rohani Abdul Karim madah, endang udah nyadi juluk ati iya deka meda SADA terus dikelala sereta ditemu mensia mayuh.
Lebuh ngelansa pasal projek ke bisi dipejalaika ba sitak Bakong, Rohani madah bisi sekeda projek dibaruh SADA baka Pengawa Ngaga Jalai Stirau-Bakong Lingga Sri Ama, Projek Waterfront Sungai Bakong Fasa 1 sereta Projek Ngemanah Infrastruktur Entali Ai enggau Parit ba sitak Stirau Antik.
Ku iya, mensia mayuh ke diau besemak udah digerah ngambika terus madah ngagai raban SADA nyema bisi sebarang penekul dalam pemansang ke dipejalaika lebih agi ba Kampung Bakong.
Tandu iya, raban SADA udah merambu deka ngatur program pejalai dikumbai Siri ‘Jelayah’ (pejalai) SADA 2024 dikena ngelaku seraya nempa kaul enggau komuniti di Sri Aman.
Rohani madah munyi nya maya Program Genselan Basa 2024 diatur Serakup Pengintu Pengelantang Islam Malaysia (PERKIM) Sarawak di Pelaman Gelanggang Futsal Kampung Melayu Bakong, ditu kemari.
Ngelansa pekara bukai bisi tiga iku chapi udah disayat lalu disadung ngagai 40 ruang bilik ba Kampung Bakong asil pemeri Chairperson PERKIM Sarawak Dato Hanifah Hajar Taib sereta bala kaban PERKIM.-TVS
