BETONG, 19 June : Sepenyampau RM26 juta udah dikemendarka Perintah Sarawak dikena ngemanah Jalai Mara Selangking-Nanga Sela-Tanjung Pauh ditu.
Sapit Premier Sarawak, Datuk Amar Douglas Uggah Embas madahka, tinda ungkup projek ngemanah jalai nya mega deka dibantai enda lama agi tauka abis laun bulan Julai tu.
“Kitai bisi siti agi Jalai Mara-Selangking Nanga Sela enggau Tanjung Pauh deka bela dikemanah.
“Nyadi bajet ke udah dikemendarka diatu iya nya RM26 juta dikena ngaga jalai.
“Bulan Julai, deka ditinda awak pengawa ulih digaga lengkas.
“Tu mih program kitai di Bukit Saban ditu ngaduka nambahka pemanah jalai laban dunya makin hari makin mansang,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya Pengerami Nasih Tanah Projek Penyulok, Penebak Ulu, Penebak, Ulu Layar ba Rumah Panjai Kelimbang Jaman, Penyulok Ulu Layar ditu, kemari.
Lebuh nerangka senentang Projek Ngemanah Jalai Penyulok Penebak, Ulu Penebak enggau Ulu Layar, iya ngelalau raban ke bekaul, tebal agi peranak kandang endur nya patut meri kerejasama rat ngagai ejensi pengatur enggau raban kunteriktor dikena nyeliahka sebarang isu ke ulih nekul pejalai projek nya.
Nangkan ke nya, iya meri terima kasih ngagai Premier Sarawak Datuk Patinggi Tan Sri Abang Johari Tun Openg laban asil ari pemintar iya ngatur ekonomi udah ngujungka wilayah tu nyadi menua ke bepenatai pemisi tinggi lalu meri pemaik ngagai rayat.
Ke penerang Jalai Penyulok Penebak, Ulu Penebak enggau Ulu Layar urung 4.9 kilometer pemanjai digaga ngena agih belanja RM15 juta ditaga tembu dalam timpuh 18 bulan tauka bulan November 2025.
Projek nya deka meri pemaik ngagai tiga agi rumah panjai bukai ke semak enggau menua Penyulok iya nya Rumah Maoh Jalani ba Nanga Tiga, Rumah Tayan Gani Nanga Penebak enggau Rumah Radin Wilson ba Ulu Penebak.-TVS
