BETONG, 19 June: Pengawa Perintah Sarawak dalam ngemansangka menua pesisir majak berupai enggau udah diasaika rayat menua pesisir lebih agi ba sitak Bukit Saban.
Kaban Kunsil Nengeri (ADUN) Bukit Saban Datuk Amar Douglas Uggah Embas pemansang ti dipejalaika nya udah mayuh ngubah aktiviti ninting hari komuniti lokal ba Bukit Saban enti dibanding suba maya iya agi gawa nyadi Sekretari Politik ngagai Kepala Menteri Sarawak ba taun 1977.
“Aku meda gaya ubah pemansang kita menua ditu jauh dalam kandang ari taun 1977 nyentuk ke diatu.
“Ukai semina ari api (karan) kitai ke udah bisi (bekal) ai kitai bisi, jalai raya kitai tu pan nyau manah.
“Baka nya mih pengidup kitai di menua ditu udah jauh manah,” ku iya.
Uggah ke mega Sapit Premier Sarawak madah munyi nya maya Pengerami Nasih Tanah Projek Penyulok, Penebak Ulu, Penebak, Ulu Layar ba Rumah Panjai Kelimbang Jaman, Penyulok Ulu Layar ditu, kemari.
Ku iya, pemansang ba sitak nya tusah deka diatur nyema nadai sukung ti tegap ari rayat mayuh ngagai perintah ari kelia nyentuk ke diatu.
Sama bisi ngulu pengerami nya Kaban Parlimen Betong Dr Richard Rapu, Sekretari Politik Premier Sarawak, Roselind Mapong Sabai, Residen Bagi Menua Betong Richard Michael Abunawas enggau Injinir JKR Bagi Menua Betong Jason Ng Boon Tuan.-TVS
