BETONG, 19 June: Projek Ngaga Masjid Besai Bagi Menua Betong beungkus RM15 juta enti udah tembu ila deka nyadi siti agi ikon baru ngagai pemansang di pelilih Betong.
Sapit Menteri Nembiak, Lumba enggau Pemansang Dagang Sarawak Dato Gerald Rentap Jabu madah, masjid nya ulih muat 1000 iku raban Islam ungkup sekali besembiang.
“Kitai udah nerima berita manah ari Premier Sarawak maya penemuai iya ke Betong dua minggu ke udah, dia iya setuju nambahka bajet dikena ngaga Masjid Bagi Menua Betong.
“Kitai sebedau tu udah ngira ungkus iya nya RM10 juta tang sejuta lebih udah dikena nyungkur taba.
“Diatu Premier udah meri RM5 juta dikena nentuka pengawa ngaga masjid nya dipejalaika enggau lengkas,” ku iya.
Iya ke mega Kaban Kunsil Nengeri (ADUN) Layar madah munyi nya nengah rambau Program Pengerami Raya Haji 2024 ti diatur Gerempung Pengintu Pengelantang enggau Pengelikun Genturung Pendiau (JKK), JKP Surau Darul Dakwah, Biro Indu, PPWS Kampung Tengah Betong begulai enggau Opis Pemadah Pelilih Betong, kemari.
Gerald madah diri chukup anadal enti udah tembu, masjid nya deka meri pengelantang ngagai raban Islam besembiang.
Terubah iya suba, pengawa ngaga masjid nya dianggarka beungkus RM10 juta lalu diatu benung chakah dipejalaika.
Sebedau tu, Premier Sarawak maya ngulu Pengerami Ngabang Gawai Dayak Renggat Betong 2024 udah setuju meri agih belanja tambah RM5 juta dikena nembuka pengawa ngaga masjid nya.-TVS
