BETONG, 19 June: Bisi 130 pintu rumah udah mujur dikemanah nengah Projek Nyeruri Rumah Rayat Seranta (PPRMS) ungkup sitak Parlimen Betong.
Kaban Parlimen Betong Dr Richard Rapu madahka, projek ti nguna agih belanja sepenyampau RM500,000 nya, iya nya bagi renggat keterubah ungkup taun 2024.
“Projek nya endang mantu komuniti kitai dikena ngemanah, nyeruri rumah ti repuk enggau ke bukai.
“Genap taun projek nya udah meri penguntung enggau pemaik ngagai komuniti kitai lebih agi ba Parlimen Beton.
“Nya alai, aku chukup beterima kasih ngagai iya ke dipebasa Premier laban terus meri wang turu nya dikena mantu rayat baka ba menua pesisir,”ku iya.
Iya bejaku munyi nya ngagai pemberita rambau Program Pengerami Raya Haji 2024 ti diatur Gerempung Pengintu Pengelantang enggau Pengelikun Genturung Pendiau (JKK), JKP Surau Darul Dakwah, Biro Indu, PPWS Kampung Tengah Betong begulai enggau Opis Pemadah Pelilih Betong, kemari.
Ku tandu Dr Richard chara bejalaika projek PPRMS ba Parlimen Betong iya nya bepelasarka ngagai chara ti udah disetuju enggau dilangkar tetiap pengari rayat nitihka peminta peranak ba sesebengkah kandang endur.-TVS
