SARATOK, 17 June: Tuai Raban Bansa enggau Tuai Komuniti (KMKK) lebih agi di Saratok patut nyadi siku tuai ti ulih nangkup semua pengawa sereta berani ngatur program ungkup pengelantang rayat ba baruh pegai sida.
Kaban Kunsil Nengeri (ADUN) Krian, Friday Belik madahka, sida mega mesti berani napi pemar lebih agi dalam ngatur program enggau aktiviti skala besai ti ngaul ejensi perintah sereta pengari rayat.
“Kita Tuai Rumah mesti berani sereta landik ngatur sebarang program ba rumah panjai diri empu baka ngaul opis-opis perintah sereta pengari rayat.
“Nya alai, enti kitai enda nguji, takut nya deka ngujungka kitai ngasaika penimpang ba diri empu.
“Anggap aja pengawa ke pedis nyadi pemar ba diri empu dikena nambahka penemu, pengelandik, peneleba dikena ngatur pengawa ke lebih besai,” ku iya.
Iya mansutka jaku nya rambau Pengerami Ngiling Bidai diatur Gerempung Pemansang enggau Pengelikun Genturung Pendiau (JKKK) Rumah Panjai Linggir Anyum Batu Tiga, Sebetan Krian Saratok.
Ku terang iya, ulah ti berani nguji pekara baru mega deka mantu nambahka pengelandik enggau peneleba ngatur pengawa ba siku-siku tuai.
Kelimpah ari nya, ku iya, ulah bakanya ulih nyadika penteba baru ngagai sida dalam bejalaika tangkup pengawa diri kelimpah dikena nyikap diri napi pemar besai dudi hari.-TVS
