SRI AMAN, 15 June: Pengawa ngaga Palan Latih Tinju di Sri Aman diatu masuk renggat nganti pemendar ari Opis Menteri Nembiak, Lumba enggau Pemansang Pedagang Sarawak (MYSED).
Kaban Kunsil Nengeri (ADUN) Simanggang Datuk Francis Harden Hollis madah palan latih nya ila deka digaga ba Kompleks Lumba Sri Aman.
“Kitai udah ngaga tiga ngagai empat ikar tanah dalam Kompleks Sukan Sri Aman lalu diatu benung nganti pemutus ari sida (MYSED) laba ngaul agih belanja dikena ngaga Palan Latih Tinju.
“Nyadi, aku andal nengah sukung penuh ari raban MYSED dibaruh iring Dato Sri Abdul Karim Rahman Hamzah, kitai deka diberi agih dikena ngaga palan latih nya laban kitai udah minta ungkup dua padang main bol tebuka enggau mega buding indu enggau lelaki sereta diwan makai enggau mega gelanggang tenis,” ku iya.
Iya madah munyi nya maya dirandau pengudah bejadika Program Pelanda Baton Lumba Malaysia (SUKMA) enggau Para SUKMA Sarawak 2024 Bagi Menua Sri Aman di Waterfront Sri Aman sehari tu.
Sama bisi datai Tuai Pegawai Eksekutif Sekretariat SUKMA Sarawak 2024 ke mega Sapit Sekretari Perintah Sarawak (Operasi) Datu Hii Chang Kee enggau Sapit Sekretari Mendam MYSED Dolhadi Marzuki sereta Pemangku Residen Sri Aman Mahra Salleh.
Enti udah tembu ila, iya ngarap gerempung-gerempung lumba ditu deka nguna perengkaguna nya enggau manah dikena nambahka kualiti main sereta ngansah bakat atlit sereta pemain ngarika Sarawak tauka Malaysia belaban ba pekit lumba ke bisi diatur.
Lebuh ditanya pasal palan SUKMA Sarawak ungkup main Tinju di Stadium Tetutup Simanggang, Harden madah pengawa ngemanah nbya udah masuk renggat kepenudi lalu diatu semina ngaduka agu enggau landskap stadium nya.
Bagi menua Sirm Aman deka nyadi tuai rumah endur achara pekit Tinju ti deka berengkah 16 nyentuk 23 Ogos tu ila. – TVS
