KOTA SAMARAHAN, 13 June: Pengawa ngaga jalai lambung tauka beringkat deka dipejalaika bepelasarka pematut lebih agi ngaul tanah kerapa laban endur nya ngembuan tanah ke lemi sereta enda tegap.
Menteri Kereja Raya Dato Sri Alexander Nanta Linggi madah pengawa ngaga jalai nitihka konsep nya mesti tegap ba pun dikurangka ungkus ngaduka jalai ti besai enti projek nya udah tembu.
Ku iya, pengawa ngaga jalai nitihka konsep baka selama nyangka enda engkeman laban pendiau tanah ba sitak nya ti ngujungka jalai suah rusak.
“Nya dikumbai ‘Pad-up Overland Bridge’ iya nya pilin-pilin iya mesti tegap laban nya pun iya.
“Nyadi nya mih bida iya laban tanah dia lemi, mudah digaga ari sukut ngadu iya ila engka lebih meri pemaik laban kitai ngurangka ari sukut isu ngadu laban iya enda mudah merekah tauka pelaman iya ke enda rata, tanah kerapa tu tusah deka dijaga,” ku iya.
Iya mansutka jaku iya maya aum media pengudah ngemataka proses nyerahka Palan Perubat Prima Universiti Malaysia Sarawak (UNIMAS) ngagai Opis Menteri Pelajar Tinggi ditu, kemari.
Taja pia, ku Nanta pansik penuh enggau silik patut digaga dulu ba endur bekaul sebedau sebarang atur ngaga jalai dipejalaika dikena nentuka penemban enggau sukut pengelikun projek nya.
Ku iya, pemutus deka bejalaika konsep ngaga jalai lambung nya ba tanah kerapa ukai siti pemutus ke disengkaum tang nya bepanggai ngagai sekeda kebuah bepelasarka pematut bejalaika projek nya ba sitak ke bekaul.
Sebedau tu Premier Sarawak Datuk Patinggi Tan Sri Abang Johari Tun Openg madah, Perintah Nengeri merambu deka ngaga jalai lambung ba kandang tanah kerapa dikena meri pengelantang ngagai penguna jalai raya.
Perambu nya ku iya diperunding bekau aru sekeda projek ngaga jalai ba tanah nya sebedau tu lebih agi ba menua tungga ke Asajaya-Kota Samarahan diperati nadai meri pengelantang ngagai penguna taja jalai nya digaga ba atas tanah kerapa.-TVS
