SRI AMAN, 12 June: Bisi 69 projek pemansang infrastruktur, betanam betupi, ekonomi enggau pemansang rama beungkus RM1.3 bilion udah dikemendar nengah Ejensi Pemansang Sri Aman (SADA) naka June 2024.
Chairman SADA Datuk Sri Rohani Abdul Karim madah, penyampau nya nyengkaum 17 buah projek beungkus RM166,177,540 ke udah dikemendar nengah aum kedua ejensi nya kena Hari Tiga.
“Aum kedua 2024 serak tu udah ngemendarka 17 buah projek beungkus kos RM166,177,540 nengah Komiti Pemandu.
“Nya alai, enti dikira penuh SADA udah ngemendarka 69 buah projek pemansang mungkur infrastruktur iya nya 33 projek, betanam betupi (9), ekonomi (23) enggau pemansang rama (4) ke manggai ungkus RM1.3 bilion naka June 2024,” ku iya.
Rohani mansutka jaku nya maya dirandau TVS pengudah Aum Kedua Ejensi Pemansang Sri Aman (SADA) ungkup taun 2024 bepalan ba Wisma SADA, sehari tu tadi.
Nya alai, Rohani madah nengah pemisi projek SADA dikearapka ulih ngeranchakka agi pemansang di Sri Aman lalu nempa bagi menua nya sebaka mansang baka bagi menua ke bukai.
Naka tu ku iya, bisi lima buah projek dibaruh SADA ngaul pengawa ngaga Kampus Sarawak Skill, Projek Infrastruktur enggau tiga Projek Nagang Bah ke udah tembu penuh.
Ku iya, laluh ke bukai agi diatur ba mayuh renggat lalu dikeandal ulih berengkah digaga baka ke udah diperambu abis laun ujung taun tu.-TVS
