SARATOK, 12 June: Asil penatai pemisi ke disaran deka dijapai ungkup Pesta Sarawak 2024 to deka diatur kena 25 nyentuk 27 Oktober tu ila iya nya RM2 juta.
Kaban Kunsil Nengeri (ADUN) Krian Friday Belik madah, saran nya bepelasarka penyereta lebih 400 taba ruai endur bejual ti deka dibuka dalam timpuh seminggu pengerami nya diatur.
“Kitai mega deka nyendiaka beberapa taba ruai endur bejual dibuka pengelama tujuh hari ungkup pengerami nya.
“Penyampau taba endur bejual tu iya nya lebih 400 buah.
“Nyadi penyampau asil ke disaran ulih dijapai ari pengawa bejual tu dipelabaka ulih manggai RM2 juta ngaul pedagang ari luar enggau dalam Saratok,” ku iya.
Iya madah munyi nya maya dirandau TVS pengudah tembu Aum Kedua Komiti Pengatur Pesta Saratok 2024 diatur ba Opis Pelilih Saratok, kemari.
Ku iya, urung 25 bansa aktiviti sereta program deka diatur sepanjai timpuh Pesta Saratok 2024 nyengkaum achara besai iya nya lumba perau enggau malam main asal.
Ku iya, antara pekit lumba ke disadang ulih matak penatai mensia mayuh ba pengerami serak tu ila iya nya pekit kuntau, pekit bepangka gasing enggau pekit nyumpit.-TVS
