BINTULU, 10 June: Kaban Kunsil Nengeri (ADUN) Murum, Kennedy Chukpai Ugon ngarapka nengah turu penyampau RM500 juta dikena ngemujurka projek deka meri pemaik ngagao perayat di Jelalong Tubau ditu.
Ku iya, sebedau tu perayat Jelalong Tubau udah berengkah ngasaika transformasyen pemansang infrastruktur pemun baka bekal karan 24 jam nengah sistem bekal grid ngagai rumah panjai ke udah tembu penuh ujung taun siti nyin kemari.
“Terima kasih ngagai perintah GPS laban udah ngemendarka turu tu nengah Premier kitai (Datuk Patinggi Tan Sri Abang Johari Tun Openg)
“Aku ngarapka projek tu deka dipejalaika taun ke deka datai.
“Nya alai, aku minta kerejasama perayat ditu.. anang semina madah deka ke jalai aja, tang enggai meri kerejasama.
“Nama kerejasama ke dikedeka kitai? Kerejasama ke diguna iya nya enda mantah enti (projek) nengah tanah kita,”ku iya.
Iya bejaku munyi nya rambau Program Tuai Begulai Enggau Rayat di Rumah Joseph Gawing, Sungai Satik Jelalong Tubau ditu, kemari.
Sama bisi datai Kaban Parlimen Hulu Rejang Datuk Wilson Ugak Kumbong.
Ba pengerami nya, Ugak bisi madahka geran turu penyampau RM123,000 ungkup JKKK Rumah Joseph Gawing dikena ngaduka Sistem Parit Rumah Panjai, Aktiviti Nembiak enggau ke guna ungkup raban indai.-TVS
