SERIAN, 8 June: Sebuah mesin hemodialisis berega RM41,150 ari Opis Pengintu Pengelantang Raban Bansa (JKM) Sarawak diserahka ngagai Unit hemodialisis Sepital Serian ke guna bala pesakit tungkul sengayuh di sepital nya.
Menteri Pemansang Indu, Anak Mit enggau Pengelantang Komuniti Sarawak Dato Sri Fatimah Abdullah madah, JKM Sarawak nerima 24 buah mesin hemodialisi ngambika diagih ba selampur bagi menua di Sarawak nengah belanja penuh sepenyampau RM987,600.
Bantu mesin nya ku iya deka nambahka penyampau mesin ke udah bisi ba Sepital Serian beduduk ari penyampau pesakit ke majak mayuh berubat ba sepital nya ke udah manggai 70 pesakit kenyau ari taun 2023.
“Nyadi sehari tu, Puji Tuhan kitai deka nyerahka sebuah mesin ke udah dibeli kitai taun nyin kemari enggau taun kitai nyadung iya.
“Bisi 24 buah mesin semua iya tu udah disetuju kabinet kelimpah ari bantu wang mega disediaka.
“Kitai nemu bisi mesin udah rusak sereta udah kelalu lama dikena taja udah dikemanah tang agi rusak, enda ulih guna agi,” ku iya.
Fatimah madah munyi nya maya Pengawa Nyerahka Mesin Hemodialisis Ngagai Sepital Serian, kemari.
Ku terang iya, pemeri mesin nya sebagi ari Bantu Khas Pesakit Tungkul Sengayuh (BKPBP) iya nya inisiatif Perintah Sarawak dikena mantu ngelempungka tating belanja raban pesakit tungkul sengayuh di Sarawak.
Ku iya, sukung penuh ari mayuh raban chukup beguna lebih agi dalam ngemujurka program Tanggungpengawa Rama Korporat (CSR) ungkup mantu pesakit tungkul sengayuh nerima perubat.
Sama bisi datai ba pengawa tu Kaban Kunsil Nengeri (ADUN) Bukit Semuja John Ilus enggau ke bukai.-TVS
