BINTULU, 8 June: Bisi 325 pengani ari 43 pintu ruang bilik ba Rumah Ugop Umpin di Sebauh, ditu ke tebunsa ketegal angus rumah kena 2 June tu tadi terus nerima perati ari mayuh raban nyengkaum Kaban Kunsil Nengeri (ADUN) Kemena Dato Sri Dr Stephen Rundi Utom.
Rundi ke mega Menteri Industri Pemakai, Komoditi enggau Pemansang Wilayah Sarawak madah, penemuai iya kia laban deka nemu penerang silik enggau nentuka bantu ke patut diberi ngagai sida ke tebunsa.
“Naka tu mayuh bantu diberi ari segi wang ringgit enggau ke bukai, baka ke udah dipadah aku tadi ba Rumah Ugop, sida deka diberi bantu RM5,000 sepintu.
“Udah nya genap sida mega deka nerima bantu RM100 siku, ditangkan RM200 siku ungkup sida ke besekula, kelimpah bantu dapur enggau ke bukai.
“Nyadi diatu, bantu ari raban MLNG deka meri bantu kereban dikena nyumai enggau tilam endur tinduk, kimbis enggau ke bukai kelimpah bantu mata duit RM200 sepintu.
“Udah tu ila, kitai deka meri bantu tasah ba renggat nengeri ti diberi ngagai genap pintu bilik dikena sida ngentak rumah baru sepenyampau RM70, 000 ungkup sepintu bilik.
“Aku ngarap tu deka diberi enggau jampat laban sida chukup begunaka nya.
“Siti perati rumah nya dipeda chukup jauh ari Bintulu, tu begunaka logistik ke lebih mar enggau ke bukai.
“Jalai raya mega agi nengah jalai kebun sereta empai menyana,” ku iya.
Pejalai Rundi disempulang Direktor Opis Betanam Betupi Sarawak, Dominic Chunggat, Residen Bintulu Nyurak Keti enggau Direktor Pengatur MLNG Mohamed Syazwan Abdullah @ Laga Jenggi.
Raban ari Opis Pengintu Pengelantang Raban Bansa mega udah nganjung bekal pemakai enggau bantu bukai ngagai pengani rumah panjai nya nengah saup Raban Penyaga Orang Periman Malaysia (APM) Bintulu, Raban Soldadu enggau Bomba Bintulu.
Rundi mega nangkan mensia mayuh lebih agi ba rumah panjai terus ngemeratka pengelikun sekumbang musin pengerami tu.-TVS
