SARATOK, 7 June: Pangku pengawa nyadi tuai ukai pengawa ke muntang lebih agi baka Tuai Raban Bansa tauka Penghulu, ku Friday Belik.
Kaban Kunsil Nengeri (ADUN) Krian nya madah barang sapa tuai ke udah dipadu patut seruran sedia sepanjai maya dalam ngatur rayat ke dipegai diri.
“Pengawa nyadi Penghulu tu ukai utai ke lempung lalu ukai utai ke tau diambi mudah tauka semina dikena ngulihka nama.
“Pia mega, Tuai Rumah semua kita nya dikumbai tuai ba renggat tumpuk pendiau tauka rumah panjai sereta bala tuai ba semua renggat.
“Anang enggai kiruh (ngatur rayat) laban (enti enggai kiruh) nya tau bendar pulaika penanggul rayat ke dipegai,” ku iya.
Friday mansutka pekara nya maya bejaku ba Pengawa Makai Selamat Penghulu Dikson Chendang Assan diatur ba Rumah Panjai Alie Rantau Kechala, Kabo ditu kemari.
Tandu iya, genap tuai ke udah dipadu patut nguna kuasa ke udah diberi ngagai sida enggau manah sereta adil.
“Semua kita ke udah dipadu nyadika tuai tadi endang deka bisi kuasa.
“Nya alai, lebuh udah bisi kuasa kita mesti nguna kuasa nya enggau betul sereta manah.
“Kita mesti nemu ngena kuasa nya enggau bejimat anang bechiping lebuh ngatur rayat ke dipegai,” ku lalau iya.
Dikson Chendang Assan dipadu nyadi Penghulu ungkup sitak Kabo nukar Bujang Alias Latan anak Ambau ke udah abis timpuh servis.
Sitak Kabo Krian diatu bisi 37 buah rumah panjai tauka diuan 569 pintu bilik.-TVS
