SIBURAN, 7 June: Raban pengereja pengawa ti deka gawa Sarawak patut disikap enggau pengelandik ke kompetitif sereta ngembuan daya pengulih ke tinggi.
Kaban Parlimen Puncak Borneo, Datuk Willie Mongin madah, kualiti nya chukup beguna laban dikena nangkup peminta Sarawak ti fokus ngagai sektor ekonomi baru dalam pansik, guna teknologi sereta inovasyen dikena nyadi wilayah maju manggai taun 2030.
Ku iya, guna teknologi nya beguna nyadi chara dikena nyungkak produktiviti enggau penyikar dalam organisasyen awakka ekonomi Sarawak lebih tegap ungkup pemeranak puku, beranakka puku sida ba menua tu.
“Beratika Sarawak nyadi siti kuasa ekonomi ke besai, nyadi endang patut raban pengeraja pengawa di Sarawak, disikap enggau pengelandik ke kompetitif enggau ngembuan pengulih ke tinggi.
“Pengelandik ke kompetitif tu, deka nyadi benteng ngetanka ekonomi, seraya nempa ekonomi ke tegap sereta tu tentu deka meri pengandal ngagai pemeranak pukul luar datai beranakka puku di Sarawak,” ku iya.
Iya madah munyi nya maya Program Nambahka Pengelandik Komuniti nyerumba Gawai 2024 di Siburan, kemari.
Willie madah, Sarawak bisi nyendiaka sekularship ngagai anak Sarawak ke mujur masuk palan pelajar tinggi, lebih ag ba renggat universiti ba taun baru.
Pekara nya seriris enggau juluk nempa pengereja pengawa ngembuan pengelandik tinggi sereta nyamin peluang gawa ngagai bala graduet, sereta mega nentuka industri terus mansang ngerembai.-TVS
