SARATOK, 29 Mei: Rayat ba sitak Kunsil Nengeri (DUN) Krian dilalau terus beserakup enggau nyukung perintah Gabungan Parti Sarawak (GPS) ke pemaik politik enggau pemansang terus dikemujur ba sitak nya.
ADUN Krian Friday Belik madah rayat di Krian patut nulak politik ke ekstrem baka ke udah dipegendangka sekeda parti politik laban nya ulih ngeruga pengelantang rayat di Sarawak.
“Kering mesti tegap awak ke gelumbang politik di Semenanjung din enda ulih ngeruga enda ulih ngachau arus politik kitai di Sarawak.
“Ditu enti kitai terunda-runda kitai agi deka nitih rentak politik din sida bemain politik ngena pengarap, raja sereta bansa tauka 3R.
“Reti nya tadi, tiga pekara nya ulih ngeruga penyerakup enggau kaul kitai di Sarawak ke endang dikalala udah chukup kering,” ku iya.
Iya madah munyi nya maya Pengerami Gawai Mangkung Tiang Rumah Panjai Dawai Ngichak di Sungai Galah Krian ditu, kemari.
Ku iya, pamanah iring perintah GPS betuaika Datuk Patinggi Tan Sri Abang Johari Tun Openg berupai ulih mai pemansang ngagai wilayah Sarawak nyengkaum di sitak Krian.
Tandu iya, nadai kebuah rayat di Krian enda ngulung pengari rayat GPS dudi hari tauka maya pengawa bepilih besai deka datai.
Ke penerang, urung RM115, 000 udah dikemendar nengah Projek Transformasyen Menua Pesisir (RTP) enggau Projek Mit Menua Pesisir (MRP) ngagai Rumah Panjai Dawai Ngichak di Sungai Galah.
Agih nya dikena ngemanah perengkaguna ba rumah panjai sereta dikena pengani ba rumah panjai nya bejalaika aktiviti ke pemaik sida serumah.-TVS
