BETONG, 29 Mei: Ejensi-ejensi ke bekaul enggau pejalai projek dibaruh Komiti Kereja Sektor Pemansang Agro Betanam Betupi Ejensi Pemansang Bagi Menua Betong (BDDA) dipinta terus bebendar agi gawa bejalaika pengawa sida udah tu.
Chairman komiti nya, Friday Belik madah tu betuju nentuka semua ke udah dilanggur ulih bejalaika enggau lachar lebih agi pekara bekaul enggau peminta taba projek.
“Naka tu kedua udah berengkah lalu bisi mega udah tembu lebih agi pengawa ngaga jalai kebun enggau projek bukai.
“Nya alai, kitai ngarapka ejensi pengereja pengawa terus bebendar agi dikena nentuka projek ke udah dilanggur ulih berengkah enggau lengkas lebih agi bekaul enggau peminta taba enggau ke bukai.
Iya madah munyi nya maya dirandau pengudah tembua Aum Komiti Kereja Sektor Pemansang Agro Betanam Betupi BDDA diatur ba Opis Residen Betong, empai lama.
Friday ke mega ADUN Krian madah naka tu bisi 42 projek udah dikemendar dibaruh komiti nya ke beungkus manggai RM256 juta.
Tandu iya, naka diatu bisi 10 buah projek ngemanah jalai kebun dibaruh kemata iya udah tembu lalu ungkus projek nya manggai RM4.7 juta.
Sama bisi datai Sapit Menteri Pemansang Indu, Anak Mit enggau Pengelantang Komuniti Datuk Mohd Razi Sitam, ADUN Kabong Mohd Chee Kadir, ADUN Beting Maro Razaili Gapor sereta bala pengari ejensi pengereja pengawa nya.-TVS
