KUCHING, 27 Mei: Revolusyen media konvensional ngagai jeman digital nyadi penyungkak ngagai pengerembai industri media dunya enggau lokal.
Taja pia, transisi tu ulih ngujungka penyadi bisi penerang ti enda betul nyema nadai dijaga sereta ngelanggar atur tagang.
Sapit Menteri Ba Opis Premier Sarawak (Pekara Korporat, Pmadah enggau Unit Komunikasyen Perintah Sarawak), Datuk Abdullah Saidol madah, nya alai perintah sarawak seruran ngemeratka pasal pemesai guna ekosistem media ke beradat enggau ngempu tanggungpengawa.
“Kami komited dalam nyukung profesional media, narak inovasyen enggau ngelakuka literasi media dalam nentuka landskap media kami mengkang dinamik, inklusif enggau beradat.
“Nengah kaul strategik, pemeranak puku dalam infrastruktur digital sereta inisiatif nempa kapasiti, kami bisi ati deka nguna manah penau digital ke pemaik komuniti enggau ekonomi kitai,”ku iya.
Iya madah munyi nya maya Pengawa Aum Besai Media Sarawak 2024, ditu kemari.
Abdullah mega madah, juluk Perintah Sarawak ukai semina deka neleba diri enggau jeman digital, tang mega dikena ngerandang dalam nguna manah teknologi sereta nerangka pemansang pekara ke nyadi ba Tanah Kenyalang ngagai orang luar.
Ku iya, juluk Premier Sarawak Datuk Patinggi Tan Sri Abang Johari Tun Openg ti deka ngaku penyereta enggau ulah beradat raban media diasai nyadi sukut pemadu beguna dalam nyapai agenda ekonomi digital Perintah Sarawak seraya ngurangka seraka penerang antara rayat enggau perintah.-TVS
