BELAGA, 27 Mei: Pesta Ladong Bi’o Lepa Ajau endang patut dipasuk dalam kalinda dagang temuai Sarawak.
Kaban Kunsil Nengeri (ADUN) Murum, Kennedy Chukpai Ugon madahka, tu dikena mantaika sereta ngelakuka budaya komuniti Kenyah.
“Perintah Sarawak nengah MCTP udah rejister Pesta Apau Koyan enggau Regata Belaga, selang ninting taun dalam kalinda dagang temuai perintah Sarawak.
“Aku ngarap pengudah tu ila Ladong Bi’o, Do Ledoh, Savik, Pesta Adet Tapok Penan deka dirikodka,” ku iya.
Iya mansutka jaku nya rambau bejadika Ladong Bi’o Lepa Ajau di Rumah Mersam Jok, Long Tebila Tubau ditu, empai lama.
Ladong Bi’o diatu masuk edisyen ke- 11 udah diatur ti berengkah ba taun 2013, di Uma Baha, Palan Pengentap Berumah Baru Bakun (BRS) Sungai Asap.
Bekau ari nya, Pengerami Pesta Ngetau Komuniti Kenyah berengkah dijadika achara ninting taun ari Gerempung Bansa Kenyah Sarawak (PKKS) Pampang Sungai Asap, Belaga.
Nangkan ke nya, Kaban Diwan Negara, Senator Abun Sui Anyit ti mega komuniti Kenyah Badeng madahka penegap runding ke sama deka Ladong Bi’o dipasuk dalam kalinda dagang temuai.
“Berundingka chara baka ni kitai deka ngelaku ngambika budaya kitai tu deka ngenataika asil ngagai kitai.
“Endang amat kitai negika juluk nya, ila kitai nyebut nya ba dewan negara ngambika kitai bisi aktiviti ke manah dipasuk dalam dagang temuai kitai,” ku iya.
Nengah Ladong Bi’o…lebih lima sub etnik Kenyah di pelilih Belaga, baka Kenyah Badeng, Kenyah Bakong, Kenyah Uma Kulit, Kenyah Uma Baha, Enggau Kenyah Uma Sambop begempuru seraya mandangka budaya asal komuniti Orang Ulu.
Taun nyin kemari, Kenyah Badeng Long Dungan, Belaga udah nyadi tuai rumah lalu taun tu gintir Kenyah Bakong di sitak Tubau ngatur nya di Long Tebila, Tubau pengelama tiga hari berengkah hari lima tu tadi.-TVS
