SARATOK, 27 Mei: Ukai semina bajik tang mega landik bejaku ngujungka Sherlingtia Morgan mujur dipadu ngempu gelar Kumang Saratok 2024.
Dara bajik ari Kampung Maloi Roban tu diperati chukup lantang maya nyaut tanya ba mua raban juri enggau beratus iku temuai ke bisi datai.
“Aku berasa temegah ati laban ulih mantaika ngepan kitai Iban enggau adat main asal kitai Iban ngagai nembiak rebak baru.
“Ditu aku deka meransang bala komiti patut chakah agi ngatur pengawa mantaika adat main asal kitai Iban ngagai nembiak rebak baru ukai semina ba dalam kandang menua tang mega ba selampur menua luar,” ku iya.
Nangkan nya, ungkup pemenang gelar Lulong, Nisa James madahka, iya tetap tepantup ati enggau beterima kasih ngagai apai seduai indai iya ke udah mayuh meri sukung sereta peransang sekumbang pekit nya diatur.
“Aku berasai tepantup ati laban udah nguji enggau naka ulih.
“Nya alai, aku meri terima kasih ngagai sida laban udah nyukung aku baka ke malam tu,’ ku iya.
Ungkup pemenang gelar Selinggar Matahari , Britney Angelera Sanak iya ngasaika diri tetap tepantup ati enggau pemujur ke udah dijalai nya lalu besemaya deka nguji baru nyereta pekit udah tu ila.
“Pengasai ati aku chukup temegah taja pan semina bulih gelar Selinggar Matahari, ni nemu dudi hari nguji baru.
“Pemar ba aku sigi pedis amat deka meretika Jaku Dalam Iban kelimpah ngena ngepan ke tusah dibai bejalai (berat).
Pekit Kumang Saratok diatur diatur beserimbai enggau Pengerami Mantar Gawai Dayak Saratok 2024 di Diwan Rumah Dayak Saratok, ensana.
Semua pemenang Pekit Kumang Saratok serak tu bela pulai mai perais mata duit, trofi, selampai, bungai jari enggau setipikit disuaka bini ADUN Krian Puan Ani Isek.-TVS
