MIRI, 26 Mei: Perintah deka terus nyukung enggau meransang dalam bidang lumba seriris enggau agenda menua nempa komuniti gerai sereta ngemeranka pengawa lumba.
Menteri Nembiak, Lumba enggau Pemansang Dagang (MYSED), Dato Sri Abdul Karim Rahman Hamzah madah, achara pekit lumba patut diatur sepanjai maya dikena meri empas enggau pemaik ari sukut pengerai.
“Pekit baka tu patut diatur sepanjai maya ngambika meri empas enggau ulih diasai lalu udah nya nambahka tikas pengerai enggau kualiti idup sereta nempa atlit ke bepenau sereta tebilang.
“Kebendar runding ke gerai datai ari tubuh ke regas. Leka jaku tu mandangka pemesai guna daya idup ti ngemeranka aktiviti lumba laban pengujung iya deka meri pengelantang ngagai pengidup sesiku orang,”ku iya.
Teks jaku iya dibacha Kaban Kunsil Nengeri (ADUN) Telang Usan, Dato Dennis Ngau maya Pengerami Nutup enggau Nyuaka Perais Pekit Belaban Pedang Dikangau Sarawak 2024, kemari.
Pekit serak tu diatur Gerempung Lumba Belaban Pedang Nengeri Sarawak (PSLPNS) nyadika penyikap main belaban pedang ti deka diatur ba Miri ungkup Lumba Malaysia (SUKMA) 2024.
Bisi 150 penyereta ari Malaysia, Brunei Darussalam, Indonesia, Thailand enggau Filipina ngambi bagi ba pekit nya ti diatur pengelama empat hari berengkah 23 nyentuk 26 Mei di Permy Mall Miri.
Champion ungkup tim lelaki kategori Foil iya nya menua Thailand enggau kategori Epee iya nya Gerempung Lumba Belaban Pedang Negeri Sembilan, ditangkan tim indu kategori Foil iya nya tim Sarawak 2 enggau kategori Saber iya nya menua Brunei Darussalam.-TVS
