KUCHING, 24 Mei: Menteri Komunikasyen, Fahmi Fadzil, mejah enggau terang ulah ngamang pengelikun sereta ngachau pemberita bejalaika pengawa.
Ku iya, pemberita ngembuan hak mantaika ripot lalu sigi enda patut ditagang.
“Aku seruran nitihka penemu iya nya pemberita patut belebas dalam bejalaika pengawa sida.
“Udah nya, aku mega negika hak pemberita dalam nyimpan resia pemeri berita,” ku iya.
Iya mansutka pekara nya pengudah tembu penemuai basa ngagai Tuai Pemegai Menua (TYT) Sarawak, Tun Pehin Sri Dr Wan Junaidi Tuanku Jaafar ba Astana, sehari tu tadi.
Fahmi nerang, insiden ngaul isu pengelikun pemberita ke diamang apin lama ke udah.
Ku iya, pemberita bejalaika pengawa ke chukup beguna dalam mantaika ripot berita enggau semua raban patut bebasaka sida.
“Taja kitai nyangka enda setuju enggau penemu ke diripotka sida, tang kitai mega bisi hak nyaut baru.
“Anang ngereja ulah ke enda patut ngelanggar undang-undang. Kitai patut nyaga adat enggau ulah diri,” ku iya.
Kemari, Serakup Pemberita Nasional Semenanjung Malaysia (NUI) mansutka siti penerang bekaul enggau ulah kaban politik dituduh nyerang lalu ngamang pemberita sebuah portal berita.
Fahmi mega madah iya sedia betemu enggau kededua raban ke bekaul laban deka nemu pekara ke nyadi enggau berundingka chara mutar pekara nya. – TVS
