ENGKILILI, 23 Mei: Penatai urung 2,000 temuai ke begempuru ba Pengerami Mantar Gawai Dayak 2024 diatur Komiti Pemansang enggau Pengelikun Genturung Pendiau (JKKK) begulai enggau Palan Servis ADUN Engkilili nyadi kelai ke chukup terang mandangka Parti Gabungan Sarawak (GPS) meruan diterima rayat ba menua nya.
Mandal Presiden PDP Rolland Duat Jubin madah, iya chukup ngarapka tuai renggat tinggi parti nya terus ngetanka penyandang kerusi N. 33 Engkilili diatu iya nya Dr Johnical Rayong Ngipa ungkup Pengawa Bepilih Besai ke deka datai.
“Nengah penatai mensia ke chukup mayuh tu terang mandangka sukung penuh rayat ditu ngagai PDP selamat (tegap).
“Nya alai, ba pengawa bepilih besai deka datai (PRN) kitai tau ngetanka Johnical Rayong, nadai chalun bukai enti bepelasarka penatai mensia mayuh ke chukup mayuh baka ba pengerami sehari tu.
“Nya mih kelai ke chukup terang mandangka sida meri pengandal enggau sukung ngagai PDP,” ku iya.
Iya mansutka pekara nya maya bejaku ba Pengerami Mantar Gawai Dayak 2024 ba Rumah Panjai Jack Braoh, Pais Skrang ditu kemari.
Ku tandu iya, nya mega mandangka GPS endang siti parti ke ulih ngiring enggau mai pemansang ngagai rayat ba sitak nya.
Nya alai, ku iya mensia mayuh patut meri sukung penuh ngagai Perintah Sarawak ngambika semua langgur pemansang ke lebih meruan ulih dipejalaika ba sitak DUN Engkilili udah tu ila.-TVS
