LIMBANG, 23 Mei: Serakup Pengajar Sarawak (STU) deka terus negika pekara-pekara ti ngaul pengelantang raban pengajar ke ngajar di nengeri tu.
Presiden iya, Kullin Djayang madah berebak enggau nya iya nesau semua pengajar ke bedau nyadi kaban STU patut ngerejister diri udah tu.
“Bala pengajar di menua tu lebih agi di Sarawak patut masuk nyadi kaban serakup baka STU ngambika sama besaup mantu serakup.
“Enda patut sesiku pengajar enggai mantu serakup laban kitai endang sama bulih pemaik asil pengawa serakup.
“Enti kitai meda ba menua luar, genap serakup pengajar bisi beratus ribu kaban ketegal penyedar ngagai serakup nya.
“Serakup nya ditumbuh dikena ngelaban perintah tang dikena kaban bekerejasama nyendiaka servis ke lebih manah,” ku iya.
Iya mansutka pekara nya pengudah dirandau pemberita Pengudah Pengerami Apresiasi diatur Serakup Pengajar Sarawak (STU) Pampang Limbang di Diwan Bungai Raya Limbang empai lama.
Ku terang Kullin iya ngasaika diri berasai ensiban enggau ulah sekeda raban ke sengaja mejah pengawa serakup ti ngangkatka profesyen ngajar enggau nyaga pengelantang kaban serakup nya sebedau tu.
Pekara baka nya ku iya enda patut dipetalat laban semua orang ke gawa perintah endang nemu gred pengajar tauka Skim DG diatu udah ba menasan ke betul asil pengawa semua serakup pengajar enggau perintah.
Dulu ari nya, pengerami nya diatur dikena ngerami urung 40 iku kaban STU enggau ex-kaban STU Limbang ke udah bulih ‘Pingat Jasa Bakti’ enggau ‘Pinggat Keahlian Setia’ ari serakup nya.
Nangkan ke nya bisi diatur pengawa nyuaka insentif ngagai nembiak nyulut iya nya anak kaban STU ke mujur bulih pemutus nyulut ba peresa perintah.
Sama bisi datai Sapit Presiden STU Lungan Ding, Chairman STU Limbang Albinus Arbut, Pegawai Opis Pelajar Pelilih Limbang Mat Zinan Wahit enggau ke bukai.-TVS
